| 一位曾患思覺失調嘅媽媽 |
當日最後一位畫嘅對像。
說話較慢條斯理嘅佢，住重建區，遞上手機，問我可否幫佢女畫幅肖像。手機上嘅合照係一年前影，佢地笑容好燦爛。
無意中發現原來佢同佢女分開住，每月見一次。
亦分享了佢患思覺失調+抑鬱症嘅故事。
今年五十幾歲嘅佢，三十六歲時病情發作，「感覺」到好多人喺附近講佢，亦控制唔到脾氣。
喺屋企會擲嘢，打當時五歲嘅囝囝，嚇到兩歲嘅囡囡趴喺度。
最後佢食俗稱開心藥 (即抗抑鬱劑)，食完會好眼瞓，四肢無力。食咗十四年，宜家病情穩定，但仍要食精神藥物，不過食完會瞓唔著，所以要服用安眠藥至瞓到。
同先生分開咗嘅佢，五年前見返個女，言談間亦透露擔心會遺傳俾佢哋，幸好至今無發現任何異狀。
聽完佢故事，見佢想送張畫俾個女，我問佢有無說話想留低，結果紙上面寫 “ I ❤️ U “
再問：「你囡囡平時點叫你？等我寫埋落去。」
佢：「佢從未叫過我 (稍微突然發現嘅表情)。嗯⋯⋯曾經聽到佢同人提個時就有間接叫過我。」
最後佢問我，應唔應該生日個時至送俾佢，但佢女生日要等明年，我就提議下次見面時送啦，打鐵要趁熱呀嘛。
希望佢女收到時會開心，亦希望佢好快會聽到佢女叫佢一聲：）
Search